Mai le Ofisa o le Minisita o Tupe Maua
Aso: 21 Novema 2025

Ua faaalia le finagalo o le Minisita o Tupe Maua i lenei aso i popolega na fa’aalia e nisi o le aufaipisinisi e fa’atatau i le tele o vaega moomia mo le talosagaina o le toe fa’afouina o laisene pisinisi.

E faamaonia e le Matagaluega fautuaga a le mamalu o le aufaipisinisi ma le lagona e tutupu lava manatu faapenei pe a o’o ina faamalosia soo se mana’oga faaletulafono. E ao pea ona faailo, o nei moomiaga faaletulafono, e le oni vaega e soona tupu fua pe o ni mana’oga faaopopo. O nei vaega uma o lo’o aiaia ma faatulafonoina I lalo o le Tulafono o Laisene Pisinisi 1998, Tulafono Faatonutonu o Laisene Pisinisi 2012, ma Tulafono Faatonutonu o Teuteuga o Laisene Pisinisi 2022.

Afioga. Pauga Te’omatavui Talalelei Pauga

Na fa’amalamalama e le Minisita o le faala’uaiteleina o mana’oga o pepa moomia mo le talosaga, e pei o fa’amatalaga i le tagata moni e ona ina le pisinisi (beneficial ownership), tusipasi o tomai fa’apitoa mo ituaiga pisinisi, fa’amaoniga o le pule i fanua e faatino ai pisinisi, e faia uma nei tulaga ina ia malu puipuia ai le atina’e o le tamaoaiga o Samoa, aemaise o puipuiga mai faiga fa’asoli tulafono, ma le mautinoa o le amiotonu o galuega fa’apisinisi uma.

O lona uiga, o nei suiga o lo’o sosolo lava i taiala e tusa ai ma pulega lelei fa’avaomalo, aemaise lava i mana’oga mo le fa’ailoaina o ē e ona moni pisinisi, tulaga fa’amaoni ma le manino, ma tulaga o puipuiga fa’asaga i tupe fa’aofi mai fa’asolitulafono (anti–money laundering)

Fa’afaigofieina o le alafua mo le ‘Au Fai Pisinisi

O lo’o galulue malosi pea le Matagaluega e fa’afaigofie, vave ma sa’o tulaga o le tausisia e pisinisi o tulafono.

O nisi o galuega ua fa’agasolo e aofia ai:

• Iloiloina o Pepa talosaga mo pisinisi ia fa’afouina ma fa’afaigofie
• Fa’amanino le Lisi manino o pepa mana’omia, ma tuuina i luga o le upega tafa’ilagi ale Matagaluega.
• Auaunaga fesoasoani ma a’oa’oga fa’alaua’itele e fesoasoani ai i le tapenaina o talosaga.
• Iloilo faiga e tu’uina atu o talosaga i luga o upega tafa’ilagi e fa’aitiitia ai taimi e fa’atali.
• Fa’aaogaina o gagana Samoa ma le Faa-Peretania e fa’alauiloa fa’amatalaga e fa’atatau i vaega e moomia fa’aogaina ai metotia fa’anei ona po.

Ua fa’ataotoina foʻi e le Matagaluega se taimi talafeagai ma umi e agai mai ai le atunuu mo le faʻafouina o laisene, ina ia ʻalofia ai le faʻatopetope ma le fe’ōma’i i le taimi mulimuli, i totonu o le lua masina. O le ala lea ua mafua ai ona matou aga’i loa e amata vave le faʻafouina o laisene ia Novema 2025 seia aulia Ianuari 2026, ae o kopi o laisene pisinisi uma, o le a fa’atoa mafai ona piki’ina e amata atu ile masina o Tesema 2025 seia aulia Ianuari 2026, ona o le faʻatulagaina o le tatou polokalame faatekonolosi.

O le sini autū a le Matagaluega e le o le faia o ni papuipui, ae ia fesoasoani lea i le manuia o pisinisi ma mautinoa le tausisia o tulafono. E talosagaina ai latou o loo umia laisene ina ia fa’aaogaina polokalame fa’alauiloa, faamatalaga i luga o le upega tafa’ilagi, fa’apea avanoa e faatalanoa ai mataupu fia malamalama, a’o tapena mo le toe fa’afouina o laisene mo le tausaga 2026.

Na fa’ai’u le finagalo o le Minisita i lona toe faamalosiau ina ia faaauau pea le galulue fa’atasi ma le itu o vaega tuma’oti e toe fa’aleleia atili ai pea le faatinoina o laisene pisinisi, ma faamausali’ina ai pea le ‘anavatau a le Malo mo faiga manino ma le tonu i ana galuega faatino.

Fa’afetai lava.